2015 ජනවාරි 8 ට පෙර ලංකාව ජාත්‍යන්තරය තුළ හුදෙකළා වු ජාතියක් බවට පත්ව තිබුණි. අවුරුදු සිය ගණනක් ලංකාව සමග ගණුදෙනු කළ අපේ පැරණි මිතුරන් වූ යුරෝපයද, ඇමරිකාවද, ඔස්ට්‍රේලියාවද, අනෙකුත් පොදු රාජ්‍ය මණ්ඩලීය රටවල්ද, කළාපයේ බලවතා වන ඉන්දියාවද, අපට විරුද්ධ ස්ථාවරයක සිටියේය. එසේම කවදත් ශ්‍රී ලංකාව සමග එකපෙළට සිටගත් මැදපෙරදිග මුස්ලිම් කළාපයේ රටවල් අප සමග මාරාන්තික විරෝධයකට අවතීර්ණ වූයේ, එවකට රජය විසින් රාජ්‍ය අනුග්‍රහයෙන් රටතුළ ක්‍රියාත්මක කළ මුස්ලිම් විරෝධයේ ප්‍රතිඵලයක් ලෙසය. මෙවැනි තත්ත්වයක් තුළ යුධ අපරාධ හා මානව හිමිකම් පදනම් කොටගෙන ජාත්‍යන්තර මානව හිමිකම් කවුන්සිලය විසින් ශ්‍රී ලංකාවට සම්බාධක පැනවීමේ ආසන්නයට පැමිණ සිටියේය. මහින්ද රාජපක්ෂ ජනාධිපතිවරයා ජනවාරි 8 වන දින ජනාධිපතිවරණයකට යෑමට තීරණය කළේ සුමනදාසගේ අනාවැකි නිසා පමණක් නොවීය. එම වසරේ මාර්තු 29 වෙනිදා ලංකාවට පැණවීමට නියමිතව තිබූ ආර්ථික, සමාජයීය හා දේශපාලන සම්බාධක වලින් පසු රටතුළ ඇතිවිය හැකි ව්‍යාකූල තත්ත්වයට හා මහජන විරෝධයකට මුහුණ දීමට ප්‍රථමයෙන් මැතිවරණ පවත්වා තම ජනාධිපතිධුරය වසර අටකට දික්කර ගැනීමටය. ඉන්පසු රටතුළ කොතරම් විරෝධතා පැමිණියද, රටේ ජනතාවට කොතරම් අපහසුතාවයන්ට පත්වුවද රාජ්‍ය අයෝමය හස්තය භාවිතා කරමින්, ලෙයින් යකඩින් ජනමතය මර්ධනය කරමින්, රට පාලනය කිරීමේ අභිලාෂයක් මහින්ද රාජපක්ෂ ජනාධිපතිවරායට තිබුණි. එම යුගයේ ශ්‍රී ලංකාවේ මිතුරන් වූයේද එවැනිම රාජ්‍යයන්ය. සිරියාව, රුසියාව, චීනය, වෙනිසියුලාව, ඉරානය, ලිබියාව වැනි ලෝකයේ කොන්වූ අශීලාචාර නායකයින්, පාලකයින් පාලනය කළ රටවල්ය. රාජපක්ෂ රෙජීමය තේරුම් ගැනීමට මෙම රටවල් කදිම නිදසුන්ය.
අද එම රටවල් සාගතය, අර්බුද, යුද්ධය හා රාජ්‍ය පාලනයේ වියවුල්වලින් පිරුණු රටවල්ය. එම රටවල නායකයින් එම රටවල ජනතාව එතරම් පීඩාවට පත්වෙද්දී බලයේ රැදී සිටියි. ජනවාරී 8 වන දින යහපාලන රජය බලයට පත් නොවුනේ නම් ශ්‍රී ලාංකික ජනතාවගේ හා රටේ ඉරණම වීමට තිබුණේද අද සිරියාව, සිම්බාබ්බයට හා වෙනිසියුලාවට අත් වී තිබෙන ශෝචනීය ඉරණමයි.
අගමැතිතුමා යුරෝපයේ, ආසියාවේ හා පසුගිය සතියේ ඔස්ට්‍රේලියාවේ නිල සංචාරයක නියැලෙමින් ගොඩනගා ගැනීමට උත්සහ කරමින් සිටිනුයේ එම බිද වැටුණු ජාත්‍යන්තර සම්බන්ධතා නැවත ඇතිකර ගැනීමටය. අගමැතිතුමාගේ ඔස්ට්‍රේලියානු නිල සංචාරයේදී මුණගැසුනු ඔස්ට්‍රේලියානු අගමැතිවරයා ඇතුළු සියලුම දේශපාලනඥයින්ගේ හා නිලධාරීන්ගේ විශේෂ අවධානයක් යොමුවූ කාරණයක් වූයේ, ශ්‍රී ලංකාවෙන් ඔස්ට්‍රේලියාවට සිදුවන අනවසර සංක්‍රමණික ජාවාරම පිළිබදවයි. ඒ පිළිබද ඔවුන්ගේ මතය අගමැතිවරයා හා ප්‍රකාශ කිරීමට ඔවුන් විශේෂ උත්සහයක් ගැනුණි. මන්දයත් ඔස්ට්‍රේලියාවේ ප්‍රධාන පක්ෂ දෙකම අනවසර සංක්‍රමණික ගැටලුවේදී මහත් අපහසුතාවයකට හා අර්බූදයකට ලක් වී තිබේ. විශේෂයෙන් ඔස්ට්‍රේලියානු රජය තුළ මෙම ගැටලුව නිසාම එක්තරා අස්ථාවරභාවයක් ඇති වී තිබේ. එසේම එම රජයේ හා ඔස්ට්‍රේලියානුවන්ගේ එළියට ප්‍රකාශ නොකරන, නිල නොවන මතය වන්නේ, අනවසර සංක්‍රමික බෝට්ටු ජාවාරමට රාජපක්ෂ රෙජීමයේ හා නාවික හමුදාවේ ඇතැම් කොටස් අතර එවකට සම්බන්ධයක් තිබූ බවයි. එය එක්තරා ආකාරයක සත්‍යයක් යැයි විශ්වාස කළ හැක්කේ, ජනවාරී 8 වෙනිදාට පසු අනවසර සංක්‍රමණික බෝට්ටු ජාවාරම නැවතුණු නිසාය. පසුගිය රෙජීමයට තව රටක්, තව ආණ්ඩුවක් අර්බුදයකට ලක් කිරීමට උවමනාවක් තිබුණා යැයි ඔස්ට්‍රේලියානු රජය විසින් විශ්වාස කරයි.එම නිසාම ශ්‍රී ලංකාව මුහුණ දුන් ජාත්‍යන්තර අර්බුදයේදී අප ආරක්ෂා නොකරන තැනකට තල්ලු වී සිටියේය. එපමණක් නොව ශ්‍රී ලංකා රජය හා රාජපක්ෂ රෙජීමය සතුරන් ලෙස සළකණු ලැබීය.
නමුත් අගමැතිතුමාගේ සංචාරයේදී ඔස්ට්රේවලියානු රජය එතුමාට ඉහළ පිළිගැනීමක් හා ගෞරවයක් ලබාදුණි. විශේෂයෙන් ඔස්ට්‍රේලියානු අගමැතිවරයා විසින් වෙඩිමුර ඇතළු අලංකාරවත් පිළිගැනීමක් පාර්ලිමේන්තු මන්දිරයේදී ලබාදෙන ලදි. එය ඔස්ට්‍රේලියානු රජය විසින් බ්‍රිතාන්‍ය රැජිණ හැරුණුකොට රාජ්‍ය නායකයෙකුට ඉතාමත් කළාතුරකින් ලබාදෙන පිළිගැනීමකි. එසේම ද්විපාර්ශවික ගිවිසුම් ගණනාවකට අත්සන් තැබුණු අතර ක්‍රීඩා හා ආයෝජන පිළිබද අවබෝධතා ගිවිසුම් වලටද අත්සන් තබන ලදි. එසේම ඛණිජ වර්ග ගවේෂණයකොට සිතියම් ගත කිරීමට ඔස්ට්‍රේලියානු තාක්ෂණික සහය ලබාදීමටද එකග විය. එසේම ශ්‍රී ලංකා ඔස්ට්‍රේලියා පැරණි සම්බන්ධතා පිළිබද බොහෝ රොමෑන්ටික් කතා අගමැතිවරුන් දෙදෙනාගෙන්ම වැලන්ටයින් දිනයේදී ප්‍රකාශ විය. ක්‍රිකට් ක්‍රීඩාව පදනම් කරගත් පසමිතුරු කතා විධිමත් නිල සාකච්ඡා තුළදීද, භෝජන සංග්‍රහය තුළදීද, අග්‍රාමාත්‍ය එකොළස් වැනි ක්‍රිකට් කුසලාන තරග බිමේදීද, දෙපැත්තටම හුවමාරුවූ අතර එය සෑමදෙනාටම විනෝදයක් ගෙන දුනි.
එසේම ශ්‍රී ලංකා අග්‍රාමාත්‍ය රනිල් වික්‍රමසිංහ මැතිතුමාට විශේෂ ආරක්ෂක විධි විධාන යොදා තිබූ අතර නිල රථ පෙළ ගමන්ගත් සෑම අවස්ථාවකදීම එම රථ පෙළට ඉඩ ලබාදීමට මහ මාර්ග හා පාලම් වසා දමා තිබුණි. එය ඔස්ට්‍රේලියානුවන්ට අලුත් අත්දැකීමක් වූ අතර මෙල්බර්න් නගරයේ වෙස්ගේට් පාලම වසා දැමීම ආන්දෝලාත්මක සිදුවීමක් විය. නමුත් ඔස්ට්‍රේලියානු රජය අග්‍රාමාත්‍යවරයාගේ ආරක්ෂාව පිළිබදව දැඩි අවධානයක් යොමු කර තිබුණි. අග්‍රාමාත්‍යවරයාගේ ඔස්ට්‍රේලියානු නිල සංචාරය වචනයේ පරිසමාප්ත අර්ථයෙන්ම ඉතාමත් සාර්ථක ඔස්ට්‍රේලියා ශ්‍රී ලංකා ද්විපාර්ශවික සබදතාවල නව පිටුවක් පෙරලූ සංචාරයක් විය. එමගින් දෙරටටම බොහෝ වාසි ලබාගත හැකිය. ශ්‍රී ලාංකික ඩයස්පෝරාවේ සංක්‍රමණික සාර්ථකත්වය පිළිබදව ඔස්ට්‍රේලියානු අගමැතිවරයාගේත් පාර්ලිමේන්තු විපක්ෂ නායකවරයාගේත් අවධානය යොමු වී ඇති බව රනිල් වික්‍රමසිංහ අගමැතිවරයා හට ප්‍රකාශ කර සිටියේය.
එකඅතකින් ජාත්‍යන්තර දේශපාලනය ශ්‍රී ලංකාවට වාසි සහගත ලෙස හැඩ ගසා ගැනීමට මෙන්ම රට තුළ යෝජිත ආර්ථික ප්‍රතිසංස්කරණ ක්‍රියාත්මක කිරීමට අගමැතිවරයා විශාල ප්‍රයත්නයක් දරයි. රැකියා දස ලක්ෂයක් බිහි කිරීම, රටවටා පිහිටි සියලුම වරායන් ජාතික ආර්ථිකයට එක් කර ගත හැකි වැඩපිළිවෙලක් සකස් කිරීම, සියලුම ගුවන්තොටුපොළවල් කාර්යක්ෂමව පවත්වාගෙන යාම, ප්‍රවාහන ක්ෂේත්‍රය විධිමත් කිරීම, මහා මාර්ග ආරක්ෂිත හා වේගවත් ස්ථාන බවට පත් කිරීම, සෞඛ්‍ය සේවය හා අධ්‍යාපනය තුළින් ඵලදායී ප්‍රතිලාභ ජනතාවට ලැබෙන ලෙස එම ක්ෂේත්‍රයන් ප්‍රතිසංවිධානය කිරීම, ජාත්‍යන්තර විශ්වාසය හා ගෞරවය දිනාගත් රටක් බිහි කිරීම, ජාතීන් අතර සංහිදියාව ඇති කිරීම, ගොවිබිම් වගා බිම් බවට පත් කිරීම, එමගින් සාධාරණ මිලක් ගොවියාට ලබාදීම, අඛණ්ඩ විදුලි බල හා ජල සැපයුමක් ලබා දීම මගින් ජනතාව සුරක්ෂිත කිරීම, නීතියේ ආධිපතය හා ප්‍රජාතන්ත්‍රවාදී අධිකරණයක් ස්ථාපිත කිරීම, අගමැතිවරයා ප්‍රමුඛ යහපාලන ආණ්ඩුවේ ප්‍රමුඛ කාර්යය විය යුතුය. මෙම ආණ්ඩුවට ජනවරම ඇත්තේ එය ක්‍රියාත්මක කිරීමට මිස කිසිවක් නොකර රාජ්‍ය බලය පවත්වගෙන යාමට නොවේ. වඩා වැදගත්ම කාරණය ඒ පිළිබදව අගමැතිවරයාගේ අවබෝධය රටේ ජනතාවට සතුටු විය හැකි මට්ටමක තිබීමය.
No comments:
Post a Comment